தாக்குதல் நடத்தியது யார்? திணறுகிறது பாகிஸ்தான் : ஒரு மாதமாக நடத்திய திட்டம் அம்பலம்

இஸ்லாமாபாத்: இலங்கை கிரிக்கெட் அணி வீரர்கள் மீது தாக்குதல் நடத்தி மூன்று நாட்களாகியும், அதற்கு காரணமான பயங்கரவாதிகளை, பாகிஸ்தான் அரசால் கண்டுபிடிக்க முடியவில்லை. அதே நேரத்தில், தாக்குதல் நடத்திய பயங்கரவாதிகள் ஒரு மாதத்திற்கும் மேலாக லாகூரில் தங்கியிருந்தது விசாரணையில் தெரியவந்துள்ளது. பாகிஸ்தான் பயணம் மேற்கொண்டிருந்த இலங்கை கிரிக்கெட் அணி வீரர்கள் மீது, லாகூரில் கடந்த செவ்வாய்க் கிழமை தாக்குதல் நடந்தது. இந்தத் தாக்குதலில் கிரிக்கெட் அணி வீரர்கள் அதிர்ஷ்டவசமாக உயிர் தப்பினர். தாக்குதலுக்கு காரணமான பயங்கரவாதிகளை வேட்டையாடும் பணியில் பாகிஸ்தான் சிறப்புப் படை போலீசார் தீவிரமாக ஈடுபட்டுள்ளனர்.

“சிம்’மில் இருந்து யார், யாருக்கு பேச்சு : தாக்குதல் நடத்திய பயங்கரவாதிகளின் வீடியோ படங்கள் உள்ள போதிலும் அவர்களை கண்டுபிடித்து கைது செய்ய முடியவில்லை.தாக்குதல் நடத்திய பயங்கரவாதிகளில் ஒருவனின் புகைப்படம், லாகூரில் ரகுமான்புரா பகுதியில் வசிக்கும் ஒருவரிடம் இருந்தது. அவர் உட்பட ஐந்து பேரை, சந்தேகத்தின் பேரில் கைது செய்து போலீசார் விசாரணை நடத்திய போது, தாக்குதல் நடத்திய பயங்கரவாதிகள் 12 பேரும் ஒரு மாதத்திற்கும் மேலாக லாகூரில் தங்கியிருந்தது தெரியவந்துள்ளது.மேலும், தாக்குதல் நடத்திய பயங்கரவாதிகள் விட்டுச் சென்ற மொபைல் போனின், “சிம்’மில் இருந்து யார், யாருக்கு பேசப்பட்டுள்ளது என்பதை கண்டறியும் பணியிலும் போலீசார் ஈடுபட்டுள்ளனர். பயங்கரவாதிகள் பயன்படுத்திய, “சிம்’ கார்டுகளில் ஒன்றை பாபர் ஷாசத் என்பவன் வாங்கியுள்ளான். பஞ்சாப் மாகாணத்தில் தென்பகுதியில் உள்ள கிராமம் ஒன்றிலிருந்து அவனும், திலாவர் உசேன் என்ற மற்றொரு வாலிபரும் கைது செய்யப்பட்டுள்ளனர்.

யாரும் இதை உறுதி செய்யவில்லை: இலங்கை கிரிக்கெட் வீரர்கள் மீதான தாக்குதல் தொடர்பாக, பாகிஸ்தான் சிறப்பு படையினரால் கைது செய்யப்பட்ட ஐந்து பேரும், தாக்குதல் நடத்திய பயங்கரவாதிகளுக்கு உதவியுள்ளனர். இருந்தாலும், தாக்குதலுக்கு காரணமான பயங்கரவாதிகளையும், அவர்கள் சார்ந்த அமைப்பையும் கண்டறிய முடியவில்லை. தாக்குதல் தொடர்பாக விசாரணை நடத்தும் போலீசார் 50க்கும் மேற்பட்டவர்களை கைது செய்துள்ளதாக தகவல்கள் வெளியானாலும், அதிகாரிகள் யாரும் இதை உறுதி செய்யவில்லை.தாக்குதல் தொடர்பாக விசாரணை நடத்தும் துணை இன்ஸ்பெக்டர் ஜெனரல் முஸ்தக் அகமது சோகாரியா கூறுகையில், “பல்வேறு தகவல்களின் அடிப்படையில் போலீசார் செயல்பட்டு வருகின்றனர். இருந்தாலும், பயங்கரவாதிகள் யாரையும் கைது செய்யவில்லை. விரைவில் கைது செய்யும் வாய்ப்புகள் உள்ளன.

தாக்குதல் நடத்திய பயங்கரவாதிகள் எல்லாம் பஞ்சாப், வடமேற்கு எல்லை மாகாணம் மற்றும் பழங்குடியின பகுதிகளைச் சேர்ந்தவர்கள். நாங்கள் நடத்திய அதிரடி சோதனையின் நைஜீரியா, ஆப்கன் மற்றும் உஸ்பெகிஸ்தான் நாட்டைச் சேர்ந்தவர்கள் கைது செய்யப்பட்டனர். அவர்களிடமும் விசாரணை நடைபெற்று வருகிறது’ என்றார்.
இதற்கிடையே, லாகூரில் தாக்குதல் நடத்திய பயங்கரவாதிகள் நான்கு பேரின் வரைபடங்கள் நேற்று முன்தினம் வெளியிடப்பட்டன. சம்பவத்தையும், பயங்கரவாதிகளையும் நேரில் பார்த்தவர்கள் அளித்த விவரங்களின் அடிப்படையில், இந்த வரைபடங்கள் வெளியிடப்பட்டன.மேலும், லாகூரில் தாக்குதல் நடத்திய பயங்கரவாதிகள் சாவகாசமாக நடந்தோ அல்லது மோட்டார் சைக்கிளிலோ தப்பிச் செல்வதை தொலைக்காட்சி நிறுவனங்கள் ஒளிபரப்பியுள்ளன.அதே நேரத்தில், பயங்கரவாதிகள் பயன்படுத்திய வெள்ளை நிற காரின் முன்னாள் உரிமையாளர் தூர் ஆக்கா கைது செய்யப்பட்டு, புலனாய்வு நிறுவனங்களிடம் ஒப்படைக்கப்பட்டுள்ளார். இந்த கார் லாகூரில் லிபர்டி என்ற இடத்தருகே, டைமருடன் நிறுத்தப்பட்டிருந்த போது கண்டு பிடிக்கப்பட்டது. ஆனால், தூர் ஆக்கா, தான் சில நாட்களுக்கு முன்னரே காரை விற்று விட்டதாக தெரிவித்துள்ளார்.

இந்நிலையில், லாகூரில் நடந்த தாக்குதலில் வெளிநாட்டு சதி இருக்கலாம் என, அந்நாட்டு பத்திரிகைகள் செய்தி வெளியிட்டுள்ளன. இதுதொடர்பாக அரசு தரப்பில் எந்தக் கருத்தும் தெரிவிக்கப்படவில்லை. அதே நேரத்தில், பாதுகாப்பு குறைபாடே இலங்கை அணி மீதான தாக்குதலுக்கு காரணம் என, அந்நாட்டு உயர் அதிகாரி ஒருவர் கூறியுள்ளார்.
லாகூர் தாக்குதலில் தொடர்பில்லை: புலிகள் மறுப்பு: லாகூரில் நடந்த தாக்குதலுக்கும், எங்களுக்கும் தொடர்பில்லை என, விடுதலைப் புலிகள் மறுப்பு தெரிவித்துள்ளனர். புலித் தலைவர் பிரபாகரன் போர் முனையில்தான் உள்ளார் என்றும் கூறியுள்ளனர்.விடுதலைப் புலிகளின் தகவல் தொடர்பாளர் திலீபன் இதுபற்றி ரேடியா ஒன்றுக்கு அளித்த பேட்டியில் கூறியுள்ளதாவது:லாகூரில் தாக்குதல் நடத்தியவர்களுக்கும், எங்களுக்கும் எந்தத் தொடர்பும் இல்லை. அந்தத் தாக்குதலில் எங்களுக்கு தொடர்பு இருப்பதாக கூறப்படுவதில் உண்மையில்லை. அந்தத் தாக்குதல் தொடர்பாக நாங்கள் எங்கள் கருத்தையும் தெரிவிக்கவில்லை.

நாங்கள் சரண் அடைய வேண்டும் என, விடுக்கப்பட்ட வேண்டுகோளை ஏற்க முடியாது. புலிகளுடன் 3.5 லட்சத்திற்கும் மேற்பட்டவர்கள் வசிக்கின்றனர். மட்டாளம், பொக்கரணை, முள்ளியவாய்க்கால் மற்றும் புதுமட்டாளம் ஆகிய நான்கு கிராமங்கள் எங்களின் கட்டுப்பாட்டில் உள்ளன.போர் நடக்கும் பகுதியில் உள்ள தமிழர்கள் உணவு, தண்ணீர் கிடைக்காமல் அவதிப்படுகின்றனர். பட்டினி காரணமாக இரண்டு பெண்கள், குழந்தைகள் உட்பட 11 பேர் பலியாகியுள்ளனர். புலித் தலைவர் பிரபாகரனும், அவரின் மனைவியும், குழந்தைகளும் போர் முனையில் தான் உள்ளனர்.
இவ்வாறு திலீபன் கூறியுள்ளார்.

அம்பயர்களை கடத்த திட்டம்: லாகூர் தாக்குதலில் ஈடுபட்ட பயங்கரவாதிகள், அம்பயர்களை பிணைக் கைதியாக பிடிக்க திட்டமிட்டிருந்ததாக தெரிகிறது.மும்பை தாக்குதல் சம்பவம் தொடர்பாக லஷ்கர்-இ-தொய்பாவின் “கமாண்டர்’ ஜாகி-உர்-ரகுமான் லக்வி உள்ளிட்ட சிலர் பாகிஸ்தானில் கைது செய்யப்பட்டுள்ளனர். இவர்களை விடுவிக்கவே லாகூர் தாக்குதல் நடந்ததாக கூறப்படுகிறது. பயங்கரவாதிகளின் முதல் இலக்கு சைமன் டாபல், ஸ்டீவ் டேவிஸ், கிறிஸ் பிராட், ஹசன் ராஜா உள்ளிட்ட அம்பயர்கள் மீது இருந்துள்ளது. இவர்கள் மினி வேனில் முதலில் சென்றுள்ளனர்.இதனை பின்தொடர்ந்து இரண்டாவது பெரிய பஸ்சில் இலங்கை வீரர்கள் வந்துள்ளனர். இலங்கை வீரர்கள் மீது தாக்குதல் நடத்தி மற்றவர்களின் கவனத்தை திசைதிருப்ப முடிவு செய்துள்ளனர். பின்னர் அம்பயர்கள் பயணம் செய்த மினி வேனை கடத்திச் சென்று, அவர்களை பிணைக் கைதியாக வைக்க திட்டமிட்டுள்ளனர். லக்வி உள்ளிட்டோரை விடுவித்தால் மட்டுமே அம்பயர்கள் விடுவிக்கப்படுவர் என கோரிக்கை வைக்க முடிவு செய்துள்ளனர். ஆனாலும் பயங்கரவாதிகளின் பிணைக் கைதி திட்டம் கடைசியில் பலிக்கவில்லை.

இதற்கு முன்பு 1999ல் ஜெய்ஷ்-இ-முகமது இயக்கத்தை சேர்ந்தவர்கள் இந்திய விமானத்தை காந்தகாருக்கு கடத்திச் சென்று, பயணிகளை பிணைக் கைதிகளாக பிடித்தனர். பின்னர் பயங்கரவாதி மசூத் அசார் விடுவிக்கப்பட்டார். இதே போன்றதொரு திட்டத்தோடு தான் லாகூரில் தாக்குதல் நடத்தப்பட்டதாக தெரிகிறது.டபெல் கண்டனம்: கிரிக்கெட் வீரர்கள் மீதான கொடூர தாக்குதலுக்கு உலகின் நம்பர் ஒன் அம்பயரான ஆஸ்திரேலியாவின் சைமன் டாபெல் கடும் கண்டனம் தெரிவித்துள்ளார். இது குறித்து அவர் கூறுகையில்,”” பாதுகாப்பு குளறுபடிகளே தாக்குதலுக்கு முக்கிய காரணம். தாக்குதல் நடந்த நேரத்தில் கமாண்டோ வீரர்கள் எங்கு சென்றனர் என்பதே தெரியவில்லை. விளையாட்டு களம், போர்க்களமாக மாறியுள்ளது. பாதுகாப்பாளர்கள் கைவிடப்பட்ட நிலையில் நாங்கள் தத்தளித்தோம்,” என்றார்.

Source & Thanks : dinamalar.com

Leave a Reply

Your email address will not be published.