வாக்காளர் பட்டியலில் பெயர் சேர்க்க தகுதியுள்ள 46 லட்சம் பேர்களில், 40 லட்சம் பேர் பெயர் சேர்ப்புக்கு மனு மீதமுள்ள 6 லட்சம் பேரையும் ஜுன் 5-க்குள் சேர்க்க நடவடிக்கை

தமிழகம் முழுவதும் வீடு, வீடாக 100 சதவீத வாக்காளர் சரிபார்ப்புப் பணி நடந்தது. இதில், வாக்காளர் பட்டியலில் பெயர் சேர்ப்புக்காக புதிதாக 46 லட்சம் பேர் கண்டறியப்பட்டனர்.

இதுதொடர்பாக தலைமை தேர்தல் அதிகாரி நரேஷ்குப்தா வெளியிட்டுள்ள செய்தியில் கூறி இருப்பதாவது:-

தமிழகத்தில் நடைபெற்ற வீடு, வீடாக சென்று வாக்காளர் பட்டியல் சரிபார்ப்புப் பணி தொடர்பாக, மாவட்ட தேர்தல் அதிகாரிகளுடன் கடந்த 26-ந் தேதி, வீடியோ கான்பரன்சிங் மூலம், கலந்தாய்வு கூட்டம் நடைபெற்றது. அந்த கூட்டத்தில், களசரிபார்ப்புப் பணியில் எடுக்கப்பட்டுள்ள நடவடிக்கை தொடர்பாக விவாதிக்கப்பட்டது.

இந்த சரிபார்ப்பு நடவடிக்கையின் மூலமாக, வாக்காளர் பட்டியலில் 46 லட்சத்து 7 ஆயிரம் பேரது பெயர்கள் சேர்க்கப்பட தகுதியுள்ளனவாக கண்டறியப்பட்டன. இவ்வாறு கண்டறியப்பட்டவர்களில், 40 லட்சத்து 8 ஆயிரம் பேர், தங்கள் பெயர்களை வாக்காளர் பட்டியலில் சேர்க்கக் கோரி மனு (படிவம்-6) அளித்துள்ளார்கள். மீதமுள்ள சுமார் 6 லட்சம் பேர் மனுக்களை தரவில்லை. அந்த 6 லட்சம் பேரிடமிருந்து, ஆதார ஆவணம் (ரேஷன் கார்டு போன்ற) மற்றும் புகைப்படம் போன்றவற்றுடன் படிவம்-6 மனுக்களையும் சம்பந்தப்பட்ட தேர்தல் பதிவு அதிகாரிகள் ஜுன் 5-ந் தேதிக்குள் பெற நடவடிக்கை எடுக்க வேண்டும்.

இதுபோல், வாக்காளர் பட்டியலில் 9 லட்சத்து 2 ஆயிரம் பேரின் விவரங்களில் சில திருத்தங்களை செய்ய வேண்டியுள்ளதும் கண்டறியப்பட்டது. அவர்களில், உரிய திருத்தங்களை மேற்கொள்ளவேண்டி, 7 லட்சத்து 37 ஆயிரம் பேர் மனு (படிவம்-8) செய்துள்ளார்கள். இதிலும், விடுபட்டவர்களிடமிருந்து உரிய படிவங்களை அதிகாரிகள் பெறவேண்டும்.

சமீபத்தில், பெங்களூரு நகரில் தென்மாநிலங்களின் தலைமை தேர்தல் அதிகாரிகளின் மாநாடு நடைபெற்றது. அதில், “வரும் ஜுலை மாதத்தில், நாடு முழுவதிலும் 2010-ம் ஆண்டுக்கான வாக்காளர் பட்டியல் திருத்தப் பணிகள் நடைபெறவுள்ளன. எனவே, அதற்கு முந்தைய (களசரிபார்ப்புப் பணி போன்ற) பணிகளில் எவ்வித குறைபாடும் இருக்கக்கூடாது” என்று இந்திய தேர்தல் ஆணையம் வலியுறுத்தியது. அதன் அடிப்படையிலேயே கடந்த 26-ந் தேதி மாவட்ட தேர்தல் அதிகாரிகளுக்கான கலந்தாய்வுக் கூட்டம் நடத்தப்பட்டு, உரிய ஆலோசனைகள் வழங்கப்பட்டன.

இவ்வாறு அதில் நரேஷ்குப்தா கூறியுள்ளார்.

Source & Thanks : maalaimalar

Leave a Reply

Press Ctrl+g to toggle between English and Tamil